第一次抬頭

最近大跌市, 但無咩影響心情, 因為己經歷過一兩次大跌而全倉坐貨既日子

上篇主要都係序言,交代點解會寫BLOG既原因和背景, 今篇就寫下個囡係呢一年既情況.

仍然記得老婆係囡兒出生前, 非常堅持要買一部新相機及買即影即有, 當時覺得不用這麼破費吧! 用電話影咪得 !

但到現在回想, 好彩都係老婆英明, 呢部靚相機真係捕捉左囡兒呢一年好多重要既時刻, 我第一次幫囡兒沖涼,囡兒既第一次抬頭, 凝眼自己手指, 第一次轉身, 第一次坐,第一次企起身, 第一次行, 好多好多的第一次!我同老婆到現在仍然會不時回味當時的相片, 亦都感嘆囡兒成長速, 時間過得太快了.

我仍然記得頭兩三個月, 對於老婆來說簡直係地獄, 因為我老婆堅持全人奶, 所以我老婆除了要準時泵奶, 更加要俾囡兒埋身吸吮, 而我囡兒更鐘意埋身! 基本上, 每晚都要起身一至兩次, 我地兩個當時好期待囡兒快點戒夜奶, 等我同老婆都一覺好訓, 到左第四個月, 好消息終於到, 阿囡終於戒左夜奶兩個月咁多, ><! 兩個月後, 每晚都醒, 直至現在一歲, 醒既次數好似仲密左, 有無人可以話俾我知係咩原因?

我記得我第一次替囡兒沖涼係出世後第七天, 身體真係好軟棉棉, 好似棉花糖咁軟, 我知好多父親好驚係呢個階段去抱個嬰兒, 但我覺得呢種感覺係可一不可再, 幫囡兒沖涼就更加少機會, 緃使有人可以代勞, 但我盡量都會自己親身上陣. 因為我係佢爸爸, 我好珍惜同佢相處既每一刻.

囡兒從出院到滿月的時間, 體重增加不少, 再唔係可以兩個手掌就抱得起的嬰兒. 身體亦都硬淨左好多, 上面所講軟棉棉既感覺亦都慢慢消失, 我囡兒骨頭感覺較其他嬰兒硬淨, 可能似我掛! 哈哈,辛苦命呀!

坦白說, 有時面對未識郁既嬰兒的時候, 會覺得無聊. 你同佢玩,佢會笑, 但佢又俾唔到其他反應俾你, 只有無自己一個傻下傻下係到做動作引佢地笑.

所以係我囡硬淨左後, 我和老婆就開始訓練佢, 係真慘咁細個就俾人訓練. 首先, 係抬頭, 每晚都將佢反轉, 希望可以鍛鍊佢抬頭既能力.

每次既開心都係突如其來, 有一晚囡兒突然可以自己抬頭, 我和老婆既喜悅之情真係難以形容, 並立刻舉機拍照, 叫囡兒加油加油, 兩個大人好似顛左咁.

囡兒每個階段都會帶來不同的辛苦和喜悅,感覺仍然好強烈, 好似昨日發生既事情咁.

人要活在當下, 珍惜眼前事物.

老婆支持得好辛苦, 我都好辛苦, 但幾辛苦都唯有頂住, 因為老婆要我支持,囡兒要我照顧. 

序言

基本上, 我本人並不喜歡寫作跟閱讀, 再加上係我上半世經歷的事情並沒有特別需要記錄.

至於,為什麼我會在此時此刻開始這個BLOG, 我想應該要以我成家立室之時作為一個CHECK POINT, 人生有好大的轉變, 有開心有愁苦, 所以希望可以記低自己既心路歷程同時舒發心中的鬱悶.

結婚已經兩年了, 一結婚己經造人成功, 跟老婆滿心歡喜, 陪伴老婆走過懷胎十月的旅程, 盡力滿足佢既要求, 令她有一個愉快的旅程. 萬幸的是, 她懷胎十月並沒有十分不適.

但居然, 我個囡係八分一機會上都可以得到我同老婆的”珍傳”. 我老婆感到非常自責, 醫生話要係一歲前後要持續抽血觀察. 每逄囡兒抽血前, 老婆的負面情緒又會出現, 只能安慰她, 事實上我也覺得囡兒沒有大問題, 我囡兒係七八個月己經可以係BB床上站立一小時, 到現在可以在家不停郁動, 完全不覺此”珍傳”對她有大影響, 可能最大影響就是她選擇老公及想要小孩時要小心.

結婚過左一年二人世界, 囡兒就呱呱落地, 從此就改變左我同老婆既一生, 哈哈哈, 當然在我來說開心佔大部份.

囡兒出世後, 外母那邊的租約亦完成, 等待派公屋, 故此暫時搬來一齊住順便湊孫. 待有公屋時便會搬走, 此為起初的理想想法.

我自己都己經有十多年時間沒有跟父母一起居住, 想不到婚後居然要跟別人的父母同住, 愛情真偉大, 但這個我視為惡夢既開始.

老婆坐月的時侯, 由我母親主理坐月餐單, 我母親亦願意配合老婆既意願, 起初都很順利, 兩位母親大人雖不多交流, 但情況還好吧.

及至有一天, 我母親抱著我囡兒看電視, 我外母就大爆發, 說嬰兒咁細個, 不可以睇電視架. 情況急轉直下.

之後, 外母又話不可以開燈, 對嬰兒眼晴不好

其後,又叫我老婆鷄唔好食咁多, 有激素. 菜心水果寒涼呀,又唔可以食, 只能食肉餅.

我老婆本來坐月時己經心情麻麻, 因為受盡囡兒的折磨, 再加上外母的一副我說的全是對的態度, 令到她更加崩潰. 她事隔幾個月跟我說, 好彩有我在她身邊支持她, 否則可能跟囡兒做出不快的事情了, 這真是不幸之中的萬幸.

在經歷上面的事情後, 我母親為免我難做就不過來了. 這下, 令我更加欣賞我母親, 為人母親應該萬事以子囡著想, 我亦更加對母親有愧疚感.

囡兒大得比想像中快, 由剛出世只有3.1KG, 到一個月去健康院檢查時有6.XKG, 完全追回應有的生長線, 老婆真是偉大辛苦.

但其實我都好辛苦, 每晚既睡眠時間被斬開幾節, 唯有苦中作樂, 開著部TABLET睇下波.

囡兒最開頭數月很少見爺爺嫲嫲, 所以一開頭他們也抱不了她, 看著此情此景真是無比的心酸.

基本上每次回家食飯, 母親也會為我們準備兩三天的餸, 著我們帶回家備用.

我最期待的另一件事出現了, 就是我外母有公屋了! 嘩,好開心呀, 連外家個舅父舅母姨媽姨丈都出盡力叫她一定要拎間公屋.

我係呢一個時刻又做左另一件世紀錯事, 就係叫我父親幫外母裝修, 這亦都是導致我不喜歡我外母的原因之一.

在我記憶中, 我直接跟外母交手都有三數次, 每次也很嚴重, 每次吵的原因都同下面的原因有關:

1.      執拾物件及搬走, 我不明白一個人為何有這麼多雜物? 多也不重要, 最重要是不願意去處理. 我著她執拾物件搬少少去佢間公屋, 佢就會失控, 發脾氣, 話邊有時間. 在上次租約完之前,提前兩個月通知她, 到最後什麼也沒收拾. 來到我家, 給她半年時間, 每次叫她收拾, 就說沒時間, 聽到這個原因真是無名火起. 無論是我,我老婆, 我外家也對這個人沒法子

2.      斤斤計較及記仇, 有次跟她吵架, 她說出她不做家務的原因是我老婆從來都不做, 所以她都不做, 天呀 ! 那有做母親的跟囡兒這樣算 ! 最近, 我把我囡兒的玩具放進櫃內, 不小心阻著她聽電話, 她對我老婆發脾氣, 及至今天還為此事計較. 我真接受不了這種母親, 可能就是她的經歷導致.

其實, 在做婚前輔導時, 都有提到兩人結合,並不是一男一女連在一起這麼簡單, 而是兩個家庭連在一起. 我父母在我結婚前也有忠告, 你要有心理準備,去照顧她母親. 現在回想, 真是不聽老人言, 吃虧在眼前!

老婆是一個好老婆, 願意為我作出配合及犧牲, 可能我需要更大的加量去處理外母這個問題, 希望在未發生嚴重事情前, 可以有一個完滿既解決方法.

做人父母, 才知自己父母有多偉大! 希望自己都能夠做到.

最後, 我希望寫BLOG可以有助我抒發我心中的情感, 因為我老婆話我發夢都是鬧人為主, 可見我情緒其實不穩及需要正視.

這篇就此作罷, 下次主力寫我可愛的囡兒.